Bisperas

Anong gagawin nyo mamyang bisperas ng 2008? Kainan, inuman, asaran, putukan tapos paitiman ng ilong at tenga pagkatapos ng mga kakagimbal na putukan at sempre, tulugan.

Nung asa Pinas ako, asa kalye kaming lahat. Labas masok sa may bahay ng may bahay. Minsan naka polkadots kasi tinahi ni nanay e. Tapos dapat puno ng barya ang mga bulsa. At sempre ang unang ingay na ginagawa ko, yung torotot o kaya naman e yung pito o kaya yung makikita ko sa kusina namin. Tapos naka display yung mga prutas na bilugan tulad ng mansanas, dalandan, kalamansi, ubas, pinya, melon, at kung ano pang makita ni nanay sa palengke. At ano pa nga ba, pati ako nagpapauto sa kinagisnang paniniwala na kapag tumalon ka daw, dagdag ng inch sa height mo; mabuti kamo mga ilang taon din akong nagtatalon, gano kaya ako kaliit kung hindi ko ginawa yon, waahhh!

Kami naman dito sa aming sulok ng mundo, iba naman ang tipo ng paghahanda para salubungin ang 2008. Kadalasan ay maliit na handaan lang para sa pamilya: kainan, bleigiessen, ang manood ng ‘Dinner for Two’ habang inaantay ang signal para mag putukan, at sempre ang fireworks at konting firecrackers.

Kapag kainan, madalas ay fondue o kaya kay raclette. Ngayong taon ay raclette ang aming drama, yung tipong parang shabu shabu pero hindi sopas ang nakalatag kundi parang mga karne, gulay, tinapay at prutas at isasalang sa barbecue grill tapos meron silang maliliit na pan at don mo ilalagay yung pagkain na gusto mong i-grill pa. At yung mga karne naman, dun nakalagay sa mismong grill plate sa taas. Mas matagal ang kainan kapag ganyan, hindi maiinip ang mga bata at hindi rin maiinip ang mga nanay at tatay. Ayoko nung fondue kasi may mantika yun e, baka di ako mag enjoy magluto kasi bantay lang ako sa mga bata.

Yung bleigiessen naman, parang hulaan ba yung iyong future. Makakabili ka ng lead kit nito sa mga tindahan. May mga iba ibang porma sila at sempre yung kutsara kung saan don mo dapat tunawin yung napili mong porma. Kung anong hugis ang lumitaw kapag natunaw yung lead, yun ang magiging future mo daw. Sempre, dapat alam mo kung ano ang ibig sabihin ng mga hugis at makikita mo yan sa internet o kaya sa mga libro. Unang taon namin itong gagawin sa bahay. Gusto pa ngang umalma ni kengkoy kasi daw mahirap linisin kapag dumikit na yung lead sa kung saang parte ng bahay. E naintindihan ko naman sya kasi sya taga linis ng bahay, hehe.

A Dinner for Two naman, ewan ko pero sikat na sikat talaga itong comedy skit na ito dito. Unang taon kong nag celebrate ng bisperas dito ay halos lahat ng TV channel ito ang palabas. At sempre, ika anim na taon ko na ito, sigurado kong ganyan pa rin ang magiging gabi namin 😀 Sikat na sikat nga ang punch line na “same procedure as every year,’ na galing dun sa skit na ito.

Ang fireworks at firecrackers dito ay nabibili lamang sa tindahan magmula ika 28 ng Disyembre hanggang sa gabi ng New Year’s Eve. Kaya naman mababaliw ka talaga sa dumog ng tao sa tindahan kapag oras ng bentahan ng paputok. At sempre, ang binibili lang namin e yung German made kasi naman yung mga galing sa Tsina at sa Poland kaya, ay tipong may chance na pumalya at pinapakita sa telebisyon kung papano nasisira ang isang kotse kapag ginamit ang isang paputok na galing Tsina at/o kaya Poland. Takot lang namin!

At kapag oras ng putukan, may mga taong sumisilip lamang mula sa bintana o kaya sa terase nila. Kami naman, dahil may konting supot kami ng fireworks, walang firecrackers ha, basta ilaw lang talaga… lumalabas din kami para naman mas enjoy ang tingalaan. Although mas kitang kita mo rin mula sa terasa yung mga galing sa bundok. Walang masyadong tao sa labas hindi katulad sa Pinas na sa labas na talaga ang party. E kasi naman ang lamig dito, ano, hehe.

Wag ka, meron din kaming bilugang prutas sa kusina namin. Sempre, enjoy na enjoy mamili si kengkoy at ang mga little kengkays ng mga bilugang prutas. Kasi nga, adopted na itong tradisyon na ito dito sa Alemanya. Pinay yata si kengkay. Bakit naman hindi, di ba?

Manigong Bagong Taon sa inyong lahat!